النجاح الإخباري - خرجت الممثلة السورية شكران مرتجى عن صمتها برسالة طويلة نشرتها على حسابيها على "فيسبوك" و"تويتر" حول  الحادثة التي شهدها منزل الفنانة اللبنانية نانسي عجرم.

وكتبت مرتجى: "بدي أحكي ما حدا لأنه رح يحكي. أنا ضد الجريمة أكيد، ضد التعدي عالآخرين وبتمنى السلامة للنجمة نانسي عجرم وعائلتها الكريمة وأنا بحب لبنان ورفقاتي أغلبهم لبنانية غاليين ودايماً فاتحين قلوبهم مو بس بيوتهم وبحبهم كلهن كلهن".

وأضافت: "ولكن ... مو كل شغلة بينسبوا كل السوريين متل ما كان قبلهم الفلسطينية عزيزي وعزيزتي اللي عم تشتمي بأبشع الكلمات وخليهم ينقلعوا من عنا. والله رح ينقلعوا والله هانت. بس بتعرف وبتعرفي إنه في ملايين الدولارات للسوريين بالبنوك اللبنانية العزيزة محجوز عليهم؟ إنه الدولار بسوريا صار بشهرين قد ما صار بعشر سنين حرب؟ ما بيكفي عنصرية عند البعض؟ ما في حدا من جد جد جدك سوري والعكس؟ لك كل شي بيصير بسوريا بينعكس ع لبنان والعكس كمان مو كل ما صار شي السوري بلبنان بده يتخبى. مو حرام بيكون عنده علاج أو سفر أو شغل بيخاف يطلع بسيارته لتتكسر".

وتابعت: "إيمتى بدنا نطفي النار ما نشعلها؟ إيمتى بدنا نرحم بعض ليرحمنا الله؟ ايمتى بدنا نبطل تشفي بوجع وجثث بعض؟ أنا مع العدالة ومع الحق بس مو مع التعميم. حاج... كم سنة عم نسمع ونقرا مسبات وإهانات وتحقير ما حاج؟ والله حاج والله حاج ‬في بسوريا فنانين ورسامين ونجوم ومصممي أزياء وكتاب وشعراء. لك نحنا بلد زنوبيا ونزار قباني وصباح فخري وميادة حناوي وأدونيس وفاتح المدرس ودريد لحام ونهاد قلعي ومالفا سهيل عرفة، عبد الفتاح سكر، منى واصف، غادة السمان، ألفت إدلبي كوليت خوري وو...".

وختمت: "وأكيد كمان أنا ماعمم عم أحكي علي عم يحكوا. وإذا غلطانة سامحوني بس تعبت شوف مسبات إذا غلي كيلو الكوسا بينسب السوري وأكيد ما بقبل بها البوست وغيره ينشتم حدا من لبنان أو أي بلد عربي. بس تعوا نحنا الفنانين المثقفين الواعيين، المواقع الفنية الصحافة مو مشان سكوب نحط عنوان بيجرح ملايين. لك ما بعرف اللي بيحب الله حاج نسب بعض. وبرجع بقول ضد السرقة والقتل والاغتصاب وكل أنواع الجريمة واللي عم يعملها بيمثل حاله مو شعب وكل السوريين مقهورين وبيزعلوا من هيك شي وأنا مالي علاقة في محاكم وأمن وجهات مختصة. مالي عم برئ حدا. همنا واحد وجعنا واحد. أدين اللص والقاتل ولا أدين جنسيته".

وأحدثت الرسالة ضجة كبيرة على مواقع التواصل الاجتماعي وتناقلها عدد كبير من الحسابات الناشطة على "إنستغرام". ‬واعتبر بعض المتابعين ذلك رداً على الفنانة هيفاء زوهبي التي علقت في وقت سابق: "ألف حمدلله على سلامتك حبيبتي نانسي انتِ وعيلتك وزوجك البطل يحميكم الرب من كل شر ويا ريت كل هالاشكال المجرمة يفلوا بقى من لبنان ".